حلاوة المولد قالتلي أتصرف

بتحب حلاوة المولد ؟؟؟....... ومين مابيحبهاش.
بس لما بتآكلها كتير، أي أي سناني ، دروسي هايموتوني من الألم ... صح؟
وحياتك ولو قليل كل سنانّا بتقوم علينا.
وإنت بتعند مع سنانك وتقول لها ماتجمدي شويه اومال بقى لو حضرتي بندقة ماري منيب !!! ، اسبوع بالكتير وحلاوة المولد هاتخلص ، ومش هأقدر أحرم نفسي منها عشانك إتصرفي بقى.
مظبووووووط ، عرفتي منين؟؟؟ ... سناني قالتلي.
أستئذنكوا أنا بقى محتاجه اقعد مع نفسي شويه ومع مطحنة الخلاط و4 علب فاضيين وإيد الهون النحاس العظيمه دي، و3 صوابع حمصيه وفوليه وسمسميه علف ، ومطرحة حمصيه.
مسكت الهون من الناحيه اللي مش بندق بيها الثوم ودب دب دب دقيت كل نوع لوحده لحتت صغيره، يوووووووه الباب بيخبط ، هو الواحد مايعرفش يقعد شويه مع نفسه في البيت ده؟
أنا: ميييييييييين؟؟ ياختى إفتحي ، قافله على روحك الباب بالمفتاح ليه؟
أنا: إدخلي وإقفلي الباب وراكي بسرعه لاحسن ماما تشوفني، إنتى أُختى حبيبتي مش هاتقوليلها أنا عارفاكي" هاتقوليلها ده في سري "
أُختي : بنت الجيران واقفه على الباب ، عايزه الهون النحاس بتاعهم .
أنا :إديلها الهون الخشب بتاعنا الخايب ده على ما أخلص بس ، الناس لبعضيها ، هو فيه زي اهوان زمان! ، يلا بسرعه ، هاتي بوسه إوعي تقولي لماما .. إوعي.
قفلت وراها بالمفتاح وجبت المطحنه ، إيد الهون مش كفايه، بدأت بالحمصيه ، شغلت المطحنه عليها سمعت المطحنه بتضرب نار.. أهم حاجه الحمص يموت قبل المطحنه ، المشكله إن في ضرب نار تاني مش قادره أحدد جاي منين " متعايشه مع المطحنه" ، يمكن الباب ؟؟ ... أيوه فعلا ده الباب بيتكسر، طفيت المطحنه" نعم ياماما"
ماما: إنتي بتعملي إيه؟ إفتحي .
أنا: حاضر ياماما شويه وهافتح.
ماما: تعالي إتفرجي على مصطفى حسني ، بيتكلم عن كيفية الإحتفال بمولد النبي .
أنا : بيقول إيه ياماما؟؟؟
ماما: بيقول الرسول صلى الله عليه وسلم كان بيحتفل باليوم ده بإنه بيصومه ، وصيام اليوم بيبعد بين الواحد وبين النار سبعين خريفا يعني سبعين سنه.
أنا: صلى الله على محمد صلى الله عليه وسلم طبعا نصوم .
رميت ودني لحد ما إتأكدت إن ماما مشيت. طحنتهم مش باقي إلا الفوليه، ماما صوتها عمّال يعلى وفي شتايم عليّا، قولت اكمل الفوليه بالمره وبعدين نتصافى ، ضرب النار علي مره واحده في المطحنه وهوووب مانطقتش إتحرررررقت.
فتحت لماما وأنا شايله كفني على إيدي وحاولت افادي طلقات الرصاص " ها هاحوش ووواجيبلك تيبيكال اللي حرقته مع أي حد جاي من السعوديه"
كان نفسي أقولها لوعرفتي فوايد حلاوة المولد " فيتامينات المستقبل" كنتي قولتي في ستين داهيه المطحنه ، هاعمل اللي عليّا واكتبلها على كل علبه فوايدها يمكن تحب تدوق.
الحمصيه:
الحمص مدر للبول وملين ومنقي للدم ويحافظ على صحة القلب ويزيل من الجسم أضرار المواد الحافظه الكيميائيه.
الفوليه: الفول مضاد للأورام ولأمراض القلب والزهايمر.
السمسميه: السمسم مضاد للشيخوخه والاورام والميكروبات .
ماما اوعي تسفيه على طول ؛ ده أنا شرقت وكنت هاموت ، قلبي مع المسحوق شوية ميه لما يبقى شبه السريلاك ، بس طعمه ألذ كتييييييير ماتخلصيهوش من فضلك.
إمضاء
سماح المره دي والنبي ياماما

صقر المعازه

أركب العربيه دي من المترو وأنا اللي لازم أركب سيدات "صدفه" ممكن أنا وإنت نقول عليها كده لكن ربنا مفيش حاجه في كونه صدفه.
قعدت حاولت أركز واشوف ريحة المخلل اللي شايلاني جايّه منين , وقعت عيني على وشه الجميل وهو بيفترس الساندوتش ... الله على شكله الله.
وعينيّا لسه معاااه .. بيقوم يقعد ست مكانه وهو بيآكل قالتله كمل أكلك قاللها لأ إتفضلي اقعدي وعزم عليها بأكل من اللي في إيده ... الله البراعم هايرجعولنا الرحمه وإحترام الكبير بعد مانضربنا في أخلاق الشباب .
واقف بيكمل أكله حس إن أنا متابعاه بعنيّا
هو : والله أنا جاي جري ... الكلام ليّا ، وأنا بحاول اوسعله مكان نفسي يقعد جنبي قولتله ليه؟؟؟
هو: إتصلوا بيّا وقالولي تعالى بسرعه إبن عمك في القفص.
أنا: قفص إيه ويعني إيه؟؟
هو: اتقبض عليه وهو بيبيع أذكار في المتروبيقولوا ماتبيعوش في المترو ممنوع.
أنا :ياحبيبي وإنت إزاي هاتطلعه؟ لازم محامي.
هو: خدت من الراجل اللي باشتغل معاه 10 جنيه من يومية بكره هادفع الغرامه وبيطلعوه ماهي مش أول مره.
أنا : إنت في سنه كام يامحمد ؟؟ وليه عمك أو أي حد كبير مايتصرفش ؟؟
محمد: اولى إعدادي , أصل أنا باحبه أوي لانه صاحبي وشبهي وجدع معايا اوي , وأهله ممكن يتأخروا عليه , واول ماتقبض عليه ملّّّى نمرتي لأصحابه وقالهم محمد هايتصرف .
أنا: هو إنت معاك موبايل؟؟
محمد : آه جايبه للمهم.
أنا :ممكن نمرتك عشان نبقى اصحاب؟؟؟
محمد: أنا مسجل نمرتي بصقر المعازه لاني مش حافظها خديها .
أرهقته بأسئلتي وفضولي لإني أعرف عنه كل حاجه, وبمنتهى عزة النفس والحياء والإختصار كان رده عليّا , كان موجوع أوي وأنا طول الوقت حاسّه إني محتاجه اغمض أوي وافتح مستنيه الصوره تكبر لفوق ويكمل طول الراجل اللي قدامي واوصل لصلعته عشان اقدر اصدق اللي باسمعه .
انا : تعرف أنا كمان رايحه سور الأزبكيه وهاننزل سوا نفس المحطه .. ترتيب ربنا..لأمش صدفه.
نزلنا ماسكين ايدين بعض في التحرير وهانركب مترو العتبه. كان خايف عليّا من المترو وهو جاي وبيبعدني بإيده.
سألته فين القفص هاجي معاك.
قاللي في المترو بس لأ امشي إنتي ، جاله تليفون من اصحاب إبن عمه وقالوله بسرعه تعالى قبل مايعدي الجمعه لو قعد لبكره هايتعرض على النيابه.
دي مفردات يتحملها عقل طفل في سنه!!! .. لأ مستحيل.
صممت أروح معاه رغم خوفي بس مش انا بقى اللي هاستعيل , وقفت بعيد ، محمد طلع 10 جنيه من جيبه بيديهم للظابط ، زقه بإيده وقال له إبعت حد من أهله.
قربت من الظابط " ماهو من أهله وهايدفع الفلوس ايه المشكله؟؟"
قاللي لازم حد كبير من اهله ببطاقه يضمنه.
سيبنا الظابط, وشوية اطفال اصحاب ابن عمه وقفوا معانا وحكولنا ان العسكري امبارح كان عايز يعمل فيه حاجات وحشه وانهم لمو من بعض النهارده وجابوله اكل كان ميت من الجوع ، محمد طلع فلوس وحلف عليهم بيها وهمّ كمان حلفوا له لأ مايصحش.
شدني من وسطهم وكان مستعجل جدا " عايزه حاجه؟؟ هامشي أنا بقى الحق ارد على البلد حد يعملله اكل ويجيله بسرعه " بيكلمني وهو واخدها طيرااااااان .
ايه كل ده!!! يادوب هاينسى وامه هاتعوضه موت ابوه لالالالالا ينسى الإتنين بالمره ، قبل مايتربى مسؤول منه تربية اتنين اخوات صغيرين بأكلهم بشربهم بغسيلهم ، الشغل قبل اللعب .
ومحمد " رااااااضي وابتسامتي مش هاتفارقني وسابغلك يادنيا شعري اسود أداري بيه شيبك، اللي انا فيه ده في ظاهره العذاب بس الباطن كله رحمه من رب العباد"
عنده حق ده اعداد إلهي قوه وشجاعه وحسن تصرف ورجوله وصبر واستاذ كبير بيلقن الناس دروس من غير مايقصد ، صداقته فخر وشرف ليّا ،اضافلي كتيرمن مره واحده ، يارب تدوم صداقتنا هاكسب كتير. ياترى بعد سنه ممكن اكون اتعلمت منه إيه؟؟؟
• المعازه ده إسم قبيلة محمد