Wednesday, January 9, 2008

WHY NOT


WHY NOT


مع إنى ضد فكرة جواز الصالونات لكن لما فكرت بعقلي قولت(WHY NOT) رزق وجاي لحد عندي وانا قاعده في مكاني . اعصر على نفسي ليمونه لمدة نص ساعه هي مدة الزياره مكسبها بتاع 50 جنيه او اكثرعلى حسب نوع العريس طبعا كريم ولا بخيل,(هاي ستاندرد ولا لوو ستاندرد) ساكن في المهندسين ولا في قلعة الكبش وأصله وفصله وما إلى ذلك. بعدها احصد الغنائم من شيكولاته, جاتوهات, فاكهه,وورد. لو طلعت الغنيمه جاتوهات وهو العريس لسه قاعد, أرتب لحفله او عيد ميلاد وهمي بأسرع ما يمكن. تليفون صغيرلأنتيمتى أشرحلها طبيعة الإحتفاليه, وأسيب الباقي عليها في إنها تعزم كل الجروب. وأول ما العريس يدّي ظهره للباب . يقابل اصحابي طالعين على السلم



الأول بنقرا الفاتحه على العريس,ناكل التورته او الجاتوه ,نستمتع بوقت الحفله, وكله من خيره. ولو فاكهه اعمل بيها ماسكات أو دايت. أما لو شيكولاته ممكن ادخل بيها على واحده عامله عمليه أو أي مناسبه تانيه طبعا. اي حد منا مايقدرش يقول للشيكولاته لأ ده العادي , أما الغريب إنك تلاقي بعض العرسان جايب في إيده علبة شيكولاته شيك وبنت ناس , مستحيل لو فتحتى واحده تقدري تكمليها, وكل ما تديها لحد وتتقطعي قدامه علشان يكملها ما يقدرش. كإن العريس وهو بيجيبها كان بيقول بالسم الهاري, وأكيد فكر ألف مره وسأل الخمسينه قبل ما يدفعها ؟!!! ياترى إنتى اخر واحده وهتكونى سبب في جوازى ولا هتجري وراكي كام خمسينه في كام عروسه في كام محافظه



أما بالنسبه للورد فخساره فيه الفلوس لأنه مش من الشخص المناسب, بيمثل دور مش دوره , وفاقد لأثره ومعناه, كمان مش هلحق اوظفه صح لأنه بيبوظ بسرعه. اه انا بتعاطف مع المجهود اللى بذله إختار البدله وبعتها للمكوجى , لمع الشوز, نشى نفسه وقرر يظهر أحلى ماعنده والوحش إداله أجازه مدفوعة الأجر مقدما . بس مش منطق ابدا إن حد

يبنى حياته على ذوق مامته او على صوره . هو انا كده ابقى شريره لو بعد كووووول ده إديته الصابونه


!!!