أول فرحتي , في جامعة النهضه

أول فرحتي , في جامعة النهضه

إمبارح كان ميعاد إستلام " أول فرحتي " ، لكن على مين ، انا خلالالاص خدت مناعه من مقالبه وأسافينه ، وطالما معاد إستلامه النهارده يبقى مش النهارده بتاعي ولا بتاعكم ، لا ده النهارده اللي هو ب 1000 سنه مماتعدون ، وكان ممكن أزعل وأبقى مستنياه زي كل مره ، لكن ده قبل ماعرف انه برج الزئبق الصيني وإن أبرز صفاته اللوع ، فكنت متأكده إني مش هاشوفه إمبارح ؛ ده الطبيعي بتاعه ، وفعلا لقيتهم هايبعتوه على أكاديمية طيبه " ماتستغربوش لازم يكون مكان تسليم البضاعه مكان فوق مستوى الشبهات علشان محدش يشك "، يبات مع الأمن لحد الصبح ، قولت هاصلي الفجر واروح قبل السمس أشوفه مع أمن الأكاديميه ,,, لإنه وحشني اووووووي .
راحت عليّا نومه ، فصحيت من النوم متأخره وجري على الموبايل عدل قبل ماغسل وشي حتى ، كلمت الراعي الرسمي للكتاب الفنان وليد فكري، ومقيل عثرات الكتاب , كل مايقع في حفره يقومه وينفض له ورقه وغلافه ، وهو مصمم الغلاف كمان بالمناسبة ، سألته على الكتاب قاللي أنا هاجيبهولك معايا بعد الشغل ، قولتله لالالا ، ماهو انا مش هأقدر أستنى لبعد الشغل أنا هجيلك على الأكاديميه وأشوفه ، نفسي أشوفه بقى ، قاللي أصل الكتاب دلوقتي في جامعة النهضه ، قولت هو لحق يدرس في عقل بالي طبعا ؟؟؟ مكنتش سمعت منه بقية الكلام قالللي إن الكتاب راح بالغلط جامعة النهضه لإن مكتوب سارة على الغطا الخارجي اللي جواه الكتب وبتوع الأمن إفتكروه يخص دكتوره إسمها سارة في جامعة النهضه فبعتوه مع الباص " كان خايف على قلبي الصدمه المره دي تجيب أجله وماكانش عايز يقوللي علشان كده " ، قولتله طب مانجيبه ، قاللي ماهو الباص اللي بيجيب الدكاتره والمعيدين هيجيبه وهو راجع النهارده من بني سويف ، سألته إيه أيه وبني سويف ليه ؟؟؟ ، قاللي ماهي جامعة النهضه دي فرع بني سويف ، يالهوووووووي , يالهوووووووي , يالهووي , لأ بقى مش ممكن ، الكتاب ده أنا غلطت في تسميته دي مش ممكن تكون أول فرحتي لالالالالالالا ، دي أول القصيده كفر ، لو كان في مجال أغير كان لازم أغير إسمه اللي مالوش أي حظ منه ده ، الكتاب ده خطر بجد ، خطر على المعيدين والدكاتره اللي هايرجعوا معاه ، وماراحش بني سويف إلا علشان يعمل بيهم حادثه وهو راجع ، ولو معملش حادثه هايفجر نفسه في الباص ، وأبقى أنا أم الشهيد ، وإفرحي ياأم الشهيد رددي أحلى نشيد ، شهيد شهيد في داهيه بس بعيد عني .