Thursday, February 14, 2008

جيش المستقبل

أنا إيه اللي جابنى هنا، أنا أتحبس 3 شهور ونص بين أربع حيطان، أكيد أنا جيت هنا غلط، بس للأسف جايه برجليّا، هو بغباوته نفس
إحساسي أول اسبوع في الحضانه، أنا أقوم دلوقتى أعيط وادبدب برجليّا وراء الباب لحد ما أصعب عليهم ويفرجوا عنى أو يتصلوا ببابا وماما علشان ياخدونى. إيه الهبل ده هو في حد ماسك فيكي حتى لو مشيتى حالا ماحدش هيسألك رايحه فين
نعم !!! إنتى بتكلمينى ؟
يا بنتى اللي واخد عقلك أنا عمّاله أقولك يلاّ علشان تنزلي البريك
حاضر حاضر هو فين البريك ده ربع ساعه مطلوب منّا نتشقلب فيها ناكل ونشرب ونصلي ونعيش حياتنا كمان
مش عارفه آكل من كا فيتيريا تجاره هي بعيده بس أنا ما بحبش غير أكلها ولاّ أقصر وآكل من القريبة زي زمايلي اللي بيعملوا ألف حساب للربع ساعه؟ لأ.. أنا هروح كافيتيريا تجاره واللي يحصل يحصل. خدتها جري وأول ما وصلت طلبت الأوردر وأنا مش عارفه آخد نفسي من فضلك ساندوتش بانيه. الكافيتيريا كانت زحمه موووووووت وفجأة بصيت في الساعه.. الربع ساعه خلصت. سيبت الأوردر وطلعت أجري, وأول ما دخلت الكلاس الميس قالتلي إنتى اتكتبتي "ليت 5 دقائق", قولتلها وأنا بانهج يا ميس مش مقامك تتكلمي في التفاهات دي، قالتلي (تايم إز مونى)، ويلاّ بسرعه إعملي (رول بلاي) مع زميلك, بالظبط أكنها دلقت عليّا كوباية ميّه مثلجه، إتشجعت وقولتلها أوكي، وعملتها وأنا باصّه في الأرض
الميس سألتني إنتى ليه مش بتبصي لزميلك في عينيه ؟ بتتكسفى ؟! ده الآي كونتاكت عندك معدوم
يالهوي يعني أنا العشرين سنه اللي فاتو ما كنتش بتعامل مع بنى آدمين امال كنت بتعامل مع إيه؟!!! ولاّ المفروض إن عينيّا تتدب فيها رصاصه وابحلق لكل واحد في عينيه؟! آآآه أنا كده فخمتو الحياء خلاص بقى "إكسباير" وبدلوه بالآي كونتاكت
ده إيه اليوم اللي مش باين له آخر ده، ولسه كمان عندي "ميتينج"هعرف منه دوري في البروجكت
أنا بس اتعلم الأساسيات في الكمبيوترعلشان أمحي أميتي فيه. يكمل الشهر ده بس وبعدها اقول يافكيك. مش فاهمه أنا إيه الضغطه دي كلها؟! ماهوالفراغ هيستفرد بينا شهور وأيام ومش بعيد سنين. لوتطول مدته هتخف ضغطته الكورس ده
الشهر خلص واليوم اللي نويت أنفد بجلدي فيه جاتلي رساله على الموبايل بتقول ( إنى طلعلي كورس هديه على اللى انا فيه )، وسمعت زمايلي بيقولوا" يا بخته اللي ياخد المنحه، ده من الموعودين" دبلومة ومجانيه ومفيده جدا للشغل" صرحتلهم إني على وشك أكنسل الكورسين، قالولى بإني أكيد يا هبلة يا عبيطه. إتفاجئت بعدها بإني ماضيه على وصل ب2500 جنيه وناسياه، كده مستحيل أخلع وإلاّ هروح في كلابوش."دي زي ماتكون دعوه وحاقت" . دخلت "سيشن" الكمبيوتر ضاربه بوزي شبرين وكان في حالة طوارئ في السنتر كله علشان في زياره لمستر جمال مبارك, دخل لنا واتطمن علينا وسألنا عن أخبار الكورس وعامل إيه معانا؟ أرد أنا ماهو ماحدش مفروس منه قدي, قولتله بص حضرتك" أنا ساكنه في حلوان باجي هنا 9 الصبح وبخلص 9 ونص باليل باركب مترو والمفروض عربية السيدات بس.. مش عارفه إيه الحكمه في إنها لحد الساعه 6 بس مع إن الكلاب الضاله بالليل أكثر منها بالنهار فبنكون في أمس الحاجه ليها بالليل، بروح أنام علشان أقوم آجي الكورس، حضرتك لو على سناننّا مش مشكله إحنا ممكن ناخد الفرش والمعجون معانا ونغسلها في السنتر وأمشاط لشعرنا .. بس الحموم نعمل فيه إيه؟! آآه نسيت إن فيه مراحيض عامه ..سوري إنى طولت على حضرتك
مستر جمال:لا ولا يهمك بس إنتى ما إقترحتيش حلول من وجهة نظرك
هو ممكن حضرتك نعمل اوتيل لطلبة السنتر بمصاريف رمزيه يدفعوا اللي كانوا بيدفعوه في مواصلاتهم أو أكثر شويه ويشتروا راحتهم، ويبقى اوتيل مختلف في كل حاجه يعنى الحيطان من الورق المقوى والسقف من مولاس القصب والأثاث كله من قش الرز والحنفيات من شاليمو العصير. وكل ده تنفيذه سهل جدا وممكن كل الشباب يساهموا فيه, كمان إحنا ماعندناش مكان نقعد فيه غير السلالم فممكن نعمل كافيتيريا كراسيها من سيقان الحنه، ميرسي جدا إن حضرتك سمحتلي بالكلام
إتضغطنا أكثر بعد اليوم ده فنسيت نوايايا السودة حبيت إصحابي وإرتبطت بالمكان واكتشفت إنى بستفيد وبعرف حاجات عمري ما كنت هعرفها وباحتك بناس وإستوعبت إن كووووول الضغطه دي لمصلحتنا علشان نقدر نتعامل مع واقع الشغل لما نخرج، وبدأنا نستعد للبريزينتيشن ونعمل بروفات جامده، ياااه كلها يومين والسجن زي ماكنت بقول عليه في الاول يخلص واللي دلوقتى بتمنى إنه يدوم، ويوم البريزينتيشن وقفت واتكلمت وعملت"آي كونتاكت وبادي لانجوتش وسيلف كونفدنت" وكنت هعيط على أحلى أيام