Sunday, September 27, 2009

طب مفتوح... قول يارب السنه الجايه

إعلام إن شاء الله ، اللي وراه إعلام إن شاء الله ، اللي بعده إستمارة إعلام مفتوح من فضلك ، ب 50 جنيه الإستماره صح ؟؟؟ باتأكد بس ............. إعلام ، إعلام ، وأنا إعلام.... إعلالالالالالالالام.
" طابور فرحان مش مصدق نفسه ، أكثر من كل اللي حلم وبيحلم وهايحلم بيه ، فوق سقف أحلامه.
وعلى العكس في الطابور الموازي تستشعر كم من الإستياء والغضب وليد شعور بظلم وإهانه
" زي ماسمعتي حضرتك إخلاء طرف من كلية إعلام ، طلب تحويل من إعلام ، من غير نظرات الدهشه والإستعجاب دي ، إحنا عاقلين أوي بكامل قوانا ولسه ماتجنناش ، وتوفيرا لوقتنا ووقتك أنا وكل اللي ورايا طالبين تحويل ورقنا من الكليه".
رغم قسوة القرار ده علينا وصعوبته ربنا يعلم قد إيه ، إلا إنه أنسب رد فعل يرضي غرورنا ، الكلية إتباعت بالرخيص ، وياريتهم حتى لما باعوا عرفوا يكسبوا، دول باعوها ب 50% مجموع و50 جنيه إستماره و120 جنيه للماده ، ونتيجة غلطتهم دي هاتفضحهم بعد 4 سنين مع تخريج أول دفعه من الإعلاميين المفتوحين ، خسروا ولاءنا وإنتماءنا وإحترامنا للكليه كطلبه ليها، ولسه هايخسروا مستقبل الكليه ورسالتها وأهدافها وأحلامها اللي كانت هاتتحقق بينا ، صغرت في نظر الناس .. كبرت في نظر الحد الأدنى واللي جايبينه ، الواحد مش عارف يقول إايه بجد !!! لو كانوا باعوا ب 80% مجموع و200 جنيه إستماره و 200 جنيه للماده مش كانت تبقى ملعوبه؟!!!.
طب إسمعوا مني النكته دي ، بيقول لك كل طالب من طلبة إعلام الحد الأوطى ، كفر سيئات باباه " بابا مين رئيس الجمهورية؟ ومين وزير الإعلام ؟ بابا بابا عاصمة دبي يابابا؟؟؟ ، وبخطك الجميل يابابا اكتبهم لي ، إيدك أبوسها ، خطي وحش ومابعرفش أقراه . وجاب مدرس يثق في حدسه يعلم له على أهم الأسئله في بنك المعلومات ، ويركز له على عواصم الدول وأعلامها ، وأسئلة الإنجليزي الثابته اللي مستحيل يخلو منها إمتحان ، ولما مكانش عنده وقت يتابع نشرات الأخبار وبرامج التوك شو وهايضيع في أسئلة الأحداث الجاريه في الإمتحان إستلف برضه بالفلوس مخ متفرغ متابع للأحداث، وكان السبب في رواج تجارة المرايات في استخدام جديد ليها " بروفات دون المستوى" إستحملت بروفات كثير لمذيعين لكن ماستحملتش تشوف منى الشاذلي بتتهان كده ... نزلت فتافيت بسرطان زجاج.
ويوم الإمتحان ، كل واحد خلص ظوافره قرقضه من التوتر ، لحد مايلاقي نفسه هو والإمتحان على جهاز كمبيوتر واحد ..
السؤال الأول: من هو اللاعب المصري الذي احترف في نادي ويجن
(أ) عمرو زكي (ب) الإجابة أ (ج) إسمع كلام ب.
السؤال الثاني : الإسم العلمي لفيروس إنفلونزا الخنازير
(أ) إتش وان إن وان (ب) H1N1 (ج) الاسم العلمي يكون باللغة الإنجليزيه.
والنتيجه تبان وهو الواحد قاعد مكانه وقلبه هايقف ، والكمبيوتر يبشره مبروك حصلت على المركز الثاني بمجموع سبعه وعشرين درجه من خمسين درجه ، وطالما هو التاني لازم يسأل مين الأول " صدق نفسه بقى والمنافسه دبت فيه"، الأول جايب 26 من 50 ناقص عنه بدرجه بسسس، ويطلع يطمن زمايله الإمتحان ميه سهل زي الميه ، وكلام الدكتوره ليلى عبد المجيد العميده طلع كلام بلالين ولا الإمتحان من 400 درجه متقسمه على 4 ولا حاجه ، مفيش بعد الإمتحان اللي من 50 درجه اللي امتحنناه ده غير المقابله الشخصيه.
وإسمعوا دي كمان ، قال إيه المجلس الأعلى للمعنويات " الجامعات سابقا ، فضى نفسه لدراسة التأثير النفسي السلبي للحد الأدنى على صاحبه من شروخ نفسيه لحطام في النفسيه لدموع وصعبانيه لإقدام على عمليات إنتحاريه بعد ضياع فرص تعليمهم , وقال لك بس هو ده السبب المعلن لقرار الإعلام المفتوح . التعليم المفتوح شكل من أشكال المساواه الإجتماعيه ، يهمنا شكلك قدام نفسك واللي حواليك مركزك الأدبي والفكري والثقافي ... ببساطه برستيجك ، والفرصه ماضاعتش كانت ضايعه ولقيناها ورجعناها بالعافيه.
ياترى إحساسنا هايبقى إيه لما تتخرج أول دفعة إعلاميين مفتوحين ، لما نقرا المقاله بأخطاء لغوية ونحويه وأخطاء صياغه تفهمك إن كاتبها صحفي من إياهم هاتصحح الأخطاء وتعالج المقاله ولا هاتقطع الجرنان ؟؟ لما المذيع يشتهجى الكلمه بالعافيه وانت وكل المشاهدين تردوه فيها، وياخد اللي فيه النصيب من اسماء الحيوانات وحسن حظه بس يخلي الشاشه تحوش عنه الضرب.
واللي يفرحك فعلا ساعتها ويشفي غليلك سرعة نقلهم لقنوات تناسبهم، وبرامج مسابقات من نوعية شيء يأكل ولايشبع وإذا شرب يموت؟؟؟؟ مع فواصل من رقص المذيعات على الأغاني الهابطه ، أو مسابقة عين مين من النجوم ، والجديد بقى مناخير مين؟
إيييييييييه دنيا ، صدق اللي قال قيراط حظ ولا فدان مذاكره ، إحنا الظاهر ضيعنا وقتنا في المذاكره وحلمنا بيضيع منَا، هانعمل إيه؟؟؟ بنضحك علشان مانعيطش.
مش إحنا اللي نقول هانعمل ايه ولا إحنا اللي نعيط ونحتار ؛ إحنا اللي كل حد فينا لازم يحدد أنسب كلية ليه بعد إعلام ويدخلها وينجح فيها وماينساش حلمه ، ويديله معاد بعد 5 سنين ،يكون نمى فيهم مواهبه او يمكن درس كورسات في الإعلام، نتخرج صحفيين ومذيعين معترف بيهم وبيترد لهم إعتبارهم والغلط بيتصلح.
حلو الكلام بس انا كان نفسي في" طب" قبل إعلام فبقول يادوب السنه دي اشتري فيها البالطو والسماعه وجهاز الضغط واستنى الطب المفتوح السنه الجايه.

0 Comments:

Post a Comment

Subscribe to Post Comments [Atom]

<< Home