Thursday, July 16, 2009

هو ليه ربنا خلق الفار؟؟؟

يمكن علشان الثعبان ياكله والقطه تاكل الثعبان اللي كل الفار أو تموت الثعبان وتاكل الفار ,,,,, معقول ربنا فضل القطه للدرجه دي!!!!

ويمكن علشان ناكل لحمته بس لأ مش ممكن لإن حتى لو كلناها بنبقى اتضحك علينا واتغشينا في ظروف غامضه , ومستحيل حد يعرف كده و يقدر يقرب أويذوق، وإفتكرت أنه مش بيبيض واللي متأكده منه بقى إني عمري ماشربت منه لبن، ده غير إن الفار بياكل حرام وربنا يكفينا شره وشر الحرام.

أو إحتمال كبير علشان الفارة مرات الفار بتولد كتير أوي " أنا شوفت ولادها مره وهمّ نونات ، أول مابيتولدوا أمامير على فكرة بس ده قبل مايتعلموا الحركة لكن ساعة مايبدأوا يتحركوا بقى ملاعين" ولإن استجابة الفار قريبه من إستجابة الإنسان بيبقى كبش الفدا وكل خلفتها تتطوع فئران تجارب.

وممكن برضه علشان نتعلم منه الذكاء ، وهو في حد بيعيش في الدنيا بس بذكاؤه!!! وكل المخلوقات بتكرهه ، مش هايتفاعل مع المجتمع كده هايعيش لوحده وإلا المجتمع كله يتقلب فئران . و بعدين ده حتى ذكاؤه مدمر .

وفار زي ده عيشته أصلها الترع والبلاعات والمصارف إيييييييه اللي وصل طموحه للعيشه في الشقق؟؟!

حتى لما بييجي يموت يا إما في مصيده وبيخبي عينيه من الفضيحه ومن شماتة الناس فيه ، يا إما مسموم ، أو ملزوق وبيصرررررخ ، حد عمره شاف فار ميت موتة ربنا ؟؟! دي علامات سوء خاتمه ، من أعمالكم سلط عليكم.

ويوم ماتشوف فار في الرؤية يبقى يوم فيراني من أوله والتفسير يقول لك تأويل الفأر رجل فاسق أو عدو أو شيطان أولص.

لما بيجيلكوا فار البيت بتعملوا إيه؟؟؟؟

أنا عن نفسي كنت باترعب واصرخ وأجري منه , وتحركاتي في الشقه تبقى كل خطوه بماما ، وأنام وعنيّا مفتحين وكوووول الذعر ده لبيتنا كله وراه فار حقير، لحد مالظروف حكمت إني ابقى أنا والفار لوحدينا في بيت واحد " مش راضي يموت ولا يمشي وبابا وماما وراهم سفر" ، قولت في عقل بالي يابت بدل مالفار يعمللك حظر تجول في أوضتك، وقلبك يقف من الخوف لازم تحترمي الفار وتكبريه وتغلبي خوفك منه، إنتي مالكيش غيره دلوقتي ، وبمنتهى الرقي اتعملنا لما اكون محتاجه المطبخ أقول له ، يسمع الكلام ويروح التواليت أو العكس وكان ينزل يجيبلي كل اللي أنا عايزاه لما حس إنه راجل البيت ، وأول ما لقي بابا وماما طالعين على السلم قاللي انا ماشي بقى مش عايزه حاجه مني؟؟ قولتله تسلملي

وقفلت وراه الباب وأنا باحمد ربنا على رجوع الأمان تاني.

1 Comments:

At August 30, 2009 at 4:28 AM , Blogger ffdfsdssd said...

ههههههههه
ما انتى حلوة اهو وبتقولى نكت
طيب لية الفار لازق فى بيتكم انتم بس اية مفيس بيوت تانى خالص
بس شربات يا خواتى

 

Post a Comment

Subscribe to Post Comments [Atom]

<< Home