Monday, March 9, 2009

حلاوة المولد قالتلي أتصرف

بتحب حلاوة المولد ؟؟؟....... ومين مابيحبهاش.
بس لما بتآكلها كتير، أي أي سناني ، دروسي هايموتوني من الألم ... صح؟
وحياتك ولو قليل كل سنانّا بتقوم علينا.
وإنت بتعند مع سنانك وتقول لها ماتجمدي شويه اومال بقى لو حضرتي بندقة ماري منيب !!! ، اسبوع بالكتير وحلاوة المولد هاتخلص ، ومش هأقدر أحرم نفسي منها عشانك إتصرفي بقى.
مظبووووووط ، عرفتي منين؟؟؟ ... سناني قالتلي.
أستئذنكوا أنا بقى محتاجه اقعد مع نفسي شويه ومع مطحنة الخلاط و4 علب فاضيين وإيد الهون النحاس العظيمه دي، و3 صوابع حمصيه وفوليه وسمسميه علف ، ومطرحة حمصيه.
مسكت الهون من الناحيه اللي مش بندق بيها الثوم ودب دب دب دقيت كل نوع لوحده لحتت صغيره، يوووووووه الباب بيخبط ، هو الواحد مايعرفش يقعد شويه مع نفسه في البيت ده؟
أنا: ميييييييييين؟؟ ياختى إفتحي ، قافله على روحك الباب بالمفتاح ليه؟
أنا: إدخلي وإقفلي الباب وراكي بسرعه لاحسن ماما تشوفني، إنتى أُختى حبيبتي مش هاتقوليلها أنا عارفاكي" هاتقوليلها ده في سري "
أُختي : بنت الجيران واقفه على الباب ، عايزه الهون النحاس بتاعهم .
أنا :إديلها الهون الخشب بتاعنا الخايب ده على ما أخلص بس ، الناس لبعضيها ، هو فيه زي اهوان زمان! ، يلا بسرعه ، هاتي بوسه إوعي تقولي لماما .. إوعي.
قفلت وراها بالمفتاح وجبت المطحنه ، إيد الهون مش كفايه، بدأت بالحمصيه ، شغلت المطحنه عليها سمعت المطحنه بتضرب نار.. أهم حاجه الحمص يموت قبل المطحنه ، المشكله إن في ضرب نار تاني مش قادره أحدد جاي منين " متعايشه مع المطحنه" ، يمكن الباب ؟؟ ... أيوه فعلا ده الباب بيتكسر، طفيت المطحنه" نعم ياماما"
ماما: إنتي بتعملي إيه؟ إفتحي .
أنا: حاضر ياماما شويه وهافتح.
ماما: تعالي إتفرجي على مصطفى حسني ، بيتكلم عن كيفية الإحتفال بمولد النبي .
أنا : بيقول إيه ياماما؟؟؟
ماما: بيقول الرسول صلى الله عليه وسلم كان بيحتفل باليوم ده بإنه بيصومه ، وصيام اليوم بيبعد بين الواحد وبين النار سبعين خريفا يعني سبعين سنه.
أنا: صلى الله على محمد صلى الله عليه وسلم طبعا نصوم .
رميت ودني لحد ما إتأكدت إن ماما مشيت. طحنتهم مش باقي إلا الفوليه، ماما صوتها عمّال يعلى وفي شتايم عليّا، قولت اكمل الفوليه بالمره وبعدين نتصافى ، ضرب النار علي مره واحده في المطحنه وهوووب مانطقتش إتحرررررقت.
فتحت لماما وأنا شايله كفني على إيدي وحاولت افادي طلقات الرصاص " ها هاحوش ووواجيبلك تيبيكال اللي حرقته مع أي حد جاي من السعوديه"
كان نفسي أقولها لوعرفتي فوايد حلاوة المولد " فيتامينات المستقبل" كنتي قولتي في ستين داهيه المطحنه ، هاعمل اللي عليّا واكتبلها على كل علبه فوايدها يمكن تحب تدوق.
الحمصيه:
الحمص مدر للبول وملين ومنقي للدم ويحافظ على صحة القلب ويزيل من الجسم أضرار المواد الحافظه الكيميائيه.
الفوليه: الفول مضاد للأورام ولأمراض القلب والزهايمر.
السمسميه: السمسم مضاد للشيخوخه والاورام والميكروبات .
ماما اوعي تسفيه على طول ؛ ده أنا شرقت وكنت هاموت ، قلبي مع المسحوق شوية ميه لما يبقى شبه السريلاك ، بس طعمه ألذ كتييييييير ماتخلصيهوش من فضلك.
إمضاء
سماح المره دي والنبي ياماما







9 Comments:

At March 9, 2009 at 11:59 PM , Blogger Unknown said...

أسلوبك حلو قوي.. تسلم ايدك

 
At March 10, 2009 at 1:15 AM , Anonymous Anonymous said...

جميل قوي يا سارة ماشاء الله عليكي
مستنية منك كل جديد يا قمر

 
At March 10, 2009 at 1:35 AM , Blogger sara said...

ميرسي يا استاذ حسام ربنا يخليك

 
At March 10, 2009 at 1:42 AM , Blogger sara said...

انا عايزه اعرف انتي مين؟؟؟ ههههههه
اكتبي حتى س.م.ع وانا هاعرف, على العموم ميرسي خالص

 
At March 15, 2009 at 12:12 PM , Blogger Sweet Violet said...

هههههههههههههههههه

كل ده علشان حلاوة المولد ؟؟؟

الحمدلله انا عندى مسموح

لكن هو انتى اللى بتطحنيها علشان السنان بس

ولا فى حاجه تانيه ؟؟؟

اصلى انا باكلها كده

 
At March 17, 2009 at 11:46 PM , Blogger Eslam Eldosoky said...

لاصوت يعلو فوق صوت حلاوة المولد
أهه أنتي اللي جبتيه لنفسك
ماهي الحاجات دي قدامنا طول السنه
حبكت يعني يوم المولد
علي العموم حصل خير
والمثل بيقول
اللي ما يجبهوش الجوع تجيبه ال...بس خلاص
تحياتي
أفكارك دايماً جديده

 
At March 18, 2009 at 7:12 AM , Anonymous Anonymous said...

مسخرررررررررررررة ههههههههههه ... انا بس عرفت دلوقتى دكاترة السنان ليه سوقهم بيعلى اوى بعد مولد النبى و مش بيروحوا بيوتهم من كتر الزباين

أ.أ

 
At March 22, 2009 at 4:10 PM , Blogger ♥نبع الغرام♥♪≈ said...

السلام عليكم ورحمة الله وبركاته
اول مرور لى
بس بجد جميله قووى بسم الله ماشاء الله
اتمنا ليكى التوفيق
وتقبلى مرورى
مع تحياتى

 
At April 20, 2009 at 12:56 AM , Blogger Sweet Violet said...

ايه ياقمر ده المولد قرب يجى تانى

^_^

انتى فين ؟؟؟

 

Post a Comment

Subscribe to Post Comments [Atom]

<< Home