باباك مين في دول؟؟؟

فاكر يوم ما قالولك مبروك بقيت أب؟
أكيد ده يوم ما يتنسيش.
ياترى من يومها لدلوقتي الابوبه جواك خدت أنهو شكل ماهم كتير؟

1. الأب المغلوب على أمره : ضحكوا عليه في الدور ده, وشهادة وفاته إتكتبت يوم ما بقى أب.إنت الوحيد اللي شايف انك لسه عايش , أما همّ مش شايفينك بس حاسين بأنفاسك الطاهره بتهفهف حواليهم زي الفراشه الشفافه كده تمام.

2. الأب البصباص أبو عين زايغه: لأ مش متهيألك ولا حاجه همّ فعلا بيبصولك إنت آه إنت من فوق لتحت ومن تحت لفوق وبجنب عينهم ونص دايره كمان.

3. الاب المزواج:للأسف فقدت إحترامهم ليك وثقتهم فيك وعزائهم الوحيد حسبي الله ونعم الوكيل فيك؛ غالبا واحده اللي بتاخد بثارهم كلهم في الآخر.

4. الأب كثير اللأ: اللي من كتر ما قال" لأ" ولاده نسيوا "الآه" ومن كتر ما قال غلط نسيو الصح وكانت النتيجه إنهم من كتر ما كذبوا عليه نسيوا الصدق, حتى لو الصدق صح ومايزعلش حد. إسمحلي إنت عايش وهم كبير , وولادك بسببك بقوا كذبه كبيره هاتفرقع في وشك إن شاء الله , ولبسوك عمه كبييييييييييييره . إذن انت قرطاس كبير.

5. الأب اللي بيدّعي المرض وبيستعطفهم بإنه هايموت: من جواهم بيقولولك كوووول مره بتقول كده ، ومن قلوبهم بيقولولك إعملها إنت بس.

6. الأب اللي فاهم الرجوله صوت عالي : اللي مستاهله واللي ماتستاهلش
"باااااااااااااس مفيش كاتم للصوت"

7. الأب الممول( مسافر على طول ): حلو أوي إنت وعظيم طول ما إنت بتدي ، يوم ماتبطل " الأب اللي يربي ويكبر مش اللي يسافر ويرجع يلاقينا على الجاهز".

8. الأب الأشكيف ( المرعب ضرب وتخويف وتعذيب): العيال أول ما يشوفوه يعملوا على نفسهم ، ويبينوله سنانهم أكنهم فرحانين برجوعه من الشغل "مفيش شغل يستمر 24 ساعه ولا اوفر تايم ياعم كنت طبق, ياسلام بقى لو سفريه العراق".

9. الأب منفصم الشخصيه: بره جنتل مان ، تشوفه بره تقول ياريت كل الأبهات زيه ، ياريتها جابت منه دسته ، أما ولاده مستغربينه دايما " الوش اللي يتلبس بره البيت ما يتلبسش جواه زي اللبس، بابا أول مايدخل البيت يغير هدومه ويقلع الوش وحتى إذا نسي هدومه ماينساش الوش لإنه بيتشد منه على الباب ، الحل إن الناس ماتتقطعش من البيت أو نتنقل بالبيت للناس".

10. الأب اللي مشاعره متشقلبه متلخبطه مضروبه في الخلاط: يحضنك بالشبشب أو بالخرزانه ، ويوم العيد يديك العيديه في إيدك ويبوسك بقلم على الخد ده وقلم على التاني عشان مايزعلش. ده بقى الأب اللي بيظهر كل مليون أب حاله نادره، يعيش ويموت ماتفهمش حقيقة مشاعره ناحيتك، وأحيانا تحس إنك لقيط مع إن لو عرفت الكلام ده من الأول؛ كنت عرفت إنه بيحبك بعدد الخرازانات والإقلام والشباشب.

11. الأب البسكوته: لو طال يسأل تحمل المسئوليه بيركبوله إيه عشان يوصل كان سأل، وداخ ال7 دوخات على كتالوج تحمل المسئوليه فص ملح وداب يارب ياجامع الناس رد إليه ضالته بس ياخساره متأخر اتجوز وطلق في شهر واكتشف انه بقى اب بعدها بس يعمل إيه مافهموش بعض ياحرام ؛ هيحاولوا بقى يبقوا متحضرين عشان مايحسسوش البيبي بأي نقص ويعيش" متقطع" اقصد في سلام بينهم.

12. الأب اللي مابيصرفش على ولاده وهو معاه: اللي مابيصرفش مايتكلمش ، حد غيرك يتكلم.
13. الأب اللي بجد: اللي بيحب ولاده أوي وهمّ أهم حاجه في حياته ، يحسن تربيتهم وتأديبهم وتعليمهم ويبقى قدوتهم.
يعني شايفينه مثل أعلى ، عايش حياته بيتعب عشانهم؛ مفيش قدامهم إختيار تاني غير إنهم يحبوه ويخافوا عليه ويحترموه ويقدروه، ومايعملوش الغلط مش خوف من عقاب قد ماهو


خوف على زعله ؛ لإن زعله ساعتها هايبقى وحش ، وليه حق ، وعقابه ممكن يكون بنظره بس أقوى من ضرب الكورباج.

14. الأب المثالي: اللي اتحرم من الأبوه ؛ مستعد يتعلم من أخطاء كل الآباء قبله،ويتخلص من مجرد إحتمال وجود عيب من اللي فاتو فيه، ويدفع آخر مليم في جيبه بس يسمع كلمة بابا.

عشان كده لازم كل الباقيين يحمدوا ربنا كل ما يسمعوا كلمة بابا، وكمان إحنا لازم نفتخر ونفرح وندندن وإحنا بنقول بابا. جرب تستمتع وانت بتقولها وماتآكلهاش بابا... بابا ... يابابا.. ياباااااااااااااابا.
قبل ما أنسى مش شرط إن الأب يبقى نوع واحد من اللي فاتو. لأ خالص, ممكن يجمع بين اكتر من شكل من اللي فات .
طبق على باباك ، وكل أب يطبق على نفسه ويشوف الابوبه جواه شكلها إيه.