عروسه من غير شبكه... ليه

إسراء عبد الفتاح قالت على الفيس بوك اضراب شوفوا جرالها إيه.
وانتوا قولتوا عروسه من غير شبكه "احضرونا ياجماعه انا باتكلم مع جروب جديد على الفيس بوك"
أنا: عروسه من غير شبكه ليه ان شاء الله ؟
الجروب:عشان نسبة العنوسه ارتفعت في مصر والغريبه ان نسبة الولاد اكبر من البنات5.5 مليون للولاد و3.5 للبنات.
أنا: ماترتفع وإيه يعنى؟ هو ده حل؟!!
الجروب: ماهي ارتفعت بسبب المغالاه في المهور والشبكات ومتطلبات الجواز.
لا والله ماتصلوا بينا على النبي بقى, ده المهور لغوها من ايام ستى وستك , والمهر دلوقتى بيكتبوا بيه شيك على بياض او كمبياله بمبلغ اقصاه خمسه وعشرين قرش فقط لا غير, وتكاليف الجواز خلاص قسموها مناصفة بين العريس والعروسه, وفي اول قعده للعريس مع ابو العروسه مش التانيه , وقبل مايطلب ايدها منه بيقوله ايه بص ياعمو من غير زعل كده احنا نتعامل انجليزي انت عليك 1-....., 2-...... 3-....... وانا كفايه عليّا كده. وكده يبقى انا اللي متحمل اكتر. انا كنت ناوي اخليها فيفتى فيفتى بس خلالالالالالالالالالاص ياااااااااااالا مش خساره في بنتك انا خليتها عليّا.
ومش قبل بس ده حتى بعد الجواز ممكن يكون البيت مفتوح بحس باباها وعادي جدا , ماهو الراجل مش بس بكلمته الراجل برعايته لبيته واسرته وكفايه نورك عليّا .
طب إيه رأيكوا في عروسه من غير شبكه, من غير شقه ولا مشقه , والقايمه ورقه فاضيه , من غير فرح ولا فرحه, من الاخر عروسه مالهاش لازمه. والخطوه الجايه جوازه من غير عروسه.
الجروب: لالالا مش كده خالص احنا بنقول نتكافل عشان نحل مشكلة العنوسه.
ياأمي افهمي ربنا قال المهر والمؤخر دول حقك شرعا, والشبكه هديه تفرحك, وانتى عمّااااااااااله تتنازلي عن حقوقك بمنتهى البساطه, وهو تقدري تقوليلي اتنازل عن ايه؟؟؟
وماتقوليليش لو معاه مش هيتأخر , عرفتى منين انه مش هيتأخرلأ بقى هيتأخر ومش بعيد مايجيش كمان.
وعلى فكره انتوا كده بتدوهم الفرصه يقولوا واقعين , بايرين , راميين روحنا عليهم ومعاهم حق.
الغالي ثمنه فيه برضه, يعنى لا تعب في انه يوصللك مانتى اللي روحتى وقولتيله بحبك, وقبل مايقوللك وانا كمان طلبتى ايده "مفيش وقت نضيعه"
وبواسطه تبع باباكي شغلتيه , وبلاها الشبكه اللي هتقف في طريق سعادتكم,حد يبص للشبكه وهو داخل على الجنه ونعيمها ده حتى يبقى اهبل, وآآآآآدي ياسيدي مفتاح الشقه , ومطبقه ايدك في مبلغ ومخبيّاها ورا ظهرك وعلى جيبه عدل عشان توهمي نفسك انك ماشيه جنب سبع البرمبه,
خد ياراجل ماتتكسفش هو في فرق بين الراجل واللي هتبقى مراته؟!
أنا بجد متغاظالكم , انتوا قلبتوا الآيه لإن ده الاستثناء مش القاعده,وانتوا كده بتسعوا لتعميم الإستثناء.
القاعده بتقول إن البنت ليها حقوق ربنا قال عليها عشان يحافظ عليها ويأمنها ويفرحها .. تاخدها.
الاستثناء إنها تتنازل عن حقها وعن فرحتها بإرادتها , واعتقد إن حتى الإستثناء محتاج استثناء إنه يكون حد يستاهل , ومقدر تضحياتها قوي قادر يحميها ويخاف عليها ضعيف قدام طلباتها.
انا قاطعتك كتير بس اخر حاجه عايزه اقولها كوفرتينا على مين ؟
لو قولت على العريس هتاكلونى, يبقى على الاتنين , وكده العريس كسبان والجوازه من مجاميعه داخلالها في الإتنين جنيه ونص يابلاش.