كوكي

كوكي

من فضلكوا يا ولاد حد ينزل القطة الشارع تشم هوا
قطط الشارع : جريوا عليها علشان تلعب معاهم
كوكي قالتلهم هتلعبوا إيه ؟؟ عندنا مطاردة فران جامدة جدا
كوكي : انتوا قدام قوي ! لسة بتطاردوهم ده أنا الجروب بتاعتي فيها 3 قطط وفارين.
سألوها وإيه الوضع بالنسبة للتعبان ؟؟
التعبان ده حبيبي
تعالي كلي معانا يا كوكي .
لأ أنا ليّا أكل سبيشيال لو كلت من الزبالة ممكن أموت فيها .أنا هطلع دلوقتي. بكره هروح أتصور للباسبور لأني هسافر الكويت - تعاقد – يلا باي اشوفكوا بعد بكره ( نيو نيو )
كوكي : أنا طلعت وأخدت شاور بالشامبو وسشورت شعري علشان الصورة وشربت اللبن ونمت
كوكي : أنا نزلتلكم زي ما إتفقنا بالظبط ( كلام قطط )
قطط الشارع : أزيك يا كوكو احنا شوفناكي وانتي راكبه العربيه كنتي رايحة فين ؟؟
كنت رايحة الجيم بالعافية ( انتي تخنتي أوي لازم تخسي علشان صحتك ) كلام كل يوم بسمعه مع إني حلوة كده وباين عليّا العز بتاع بره وكمان هي دي طلبات العرسان .
قطط الشارع : هو ده اللي مزعلِك يا كوكو ؟؟
لأ أنا أتنقرت عين النهاردة من البت الشغالة ومن الصبح وأنا بتّاوب ، ربنا يستر بصالي في الأكل والشرب واللعب وحب الناس ليّا وسمعتها بتقول للمدام : ( إيه الأملة دي ؟ كل ده للقطة طب بس وافقي وخديني بدلها وخديني بدلها وأنا مش هخليكي تحطي إيدك في حاجة ومش هكلفك ربع تكاليفها ولا أكلها هاكل اللي يتبقى منكوا ) .
قطط الشارع : إشربي علشان تنسي يا كوكي .
لأ أحنا طالعين المصيف الأسبوع الجاي وأنا فعلا كنت محتاجة التغيير ده جدا هقضي النهار كله نايمه في التكييف في الشقة لوحدي وبالليل أتفسح وأنطلق برضه لوحدي .

خرجت بالليل لعبت ....... جريت لمكان بعيد ؛ إني أعرف أرجع الشقة !!! نسيت الطريق ومش عارفة أتلم على أعصابي وبدأت أعيط أرجع إزاي؟؟؟ أدور على الشقة ؛ على المدام وولادها مفيش .
قولت لنفسي يابت يا كوكي إنتي إنتهيتي ومباقلكيش إلا الشارع وزبالته .
ده أنا رفضت قطط هاي أوي كانوا هيدفعوا مهري بالدولار وكانت صوري هتنزل على أغلفة المجلات وكنت ممكن أورث في الشقة ، ولما أكبر كان ممكن المدام تشتريلي عربيه ، وكنت ناويه أتفق مع سعد الصغير على أغنية جامدة لفرحي إشمعنى الحمار؟؟.
المدام بلغت كل الأقسام ووزعوا صور كوكي على كل الشوارع والعربيات وبتقول ياترى يا كوكي إنتي ضربتي ورقه عرفي ولا هربتي مع واحد ولو إتجوزتي على سنة الله ورسوله ياترى هتقضي (الهني مون فين؟؟؟ )