النجم الاسطورة

النجم الاسطورة

نور صاحبتي عزمتني على فيلم عمر وسلمى للوهلة الأولى حسيت إن تامر نسي يلبس التيشيرت أو تناسى ولما تكرر المشهد قولت يا حرام يمكن عنده عجز في التيشرتات والله لو جمهوره عرف كان قام معاه بأحلى واجب بدل التلوث البصري اللي سببهولنا وكل ما يتكرر المنظر اقول لصحبتي ايدك على عينك تقولي وانت كمان .

بعد الفيلم طلعنا نتغدا في مطعم . نور صحبتي تقريبا حكتلي الفيلم تاني من كتر أعجابها بيه قولتلها أرحميني ومتنسيش إني شوفته معاكي.
نور : هو أنا مقولتلكيش إني انضميت لتامر لافرز (lovers ) قولتلها (لافرز ولا ناورز ) تعرفي أنا أكثر مشهد عجبني في الفيلم مشهد الفرح
نور: بس يا سلام والباقي؟؟
(و الباقي بأه تمورة بيقولنا خلو عنكو خالص الجيل ده عليا هكحرتهولكوا بدل العيال الخام ديه )
يعني إيه ؟؟
اقولك يعني ايه يعني اول (مسيدج ) من فيلم تامر انه يقضي على الشكل المحترم للعلاقة بين الولد والبنت يعني ما تستغربيش لما زميلك في الجامعة بدل ما يقولك صباح الخير ويطلب يتعرف عليكي يقولك (هو ده ويزغزغك ) ولما تناوليه بالقلم مفيش مشكله ولما يحصل أي شد بسيط بينك وبينه يتف عليكي ويقولك يحرق اهلك وغيره من الكلام البيئة

نورة : نورتي المحكمة يا ستي .
إزعلي براحتك أنتي واللي زيك بتحبوه حب أعمى بدون ادنى تفكير بتاخدوا على قفاكوا وتقولوا كمان ده آخر أغنية سمعتها له بتقول ( والله ما هرجع تاني لو وقفتي على ايديكي / لازم اربيكي / عملتك واحده وبقى ليكي لازمة )
Roman">والبنات الهبل بيغنوها عادي جدا ومين هيربي تموره على الكلام ده.
نور : هو تامر قتلك قتيل؟
بالعكس انا مش ضده وليه أغاني كثير بحبها وفي نفس اليوم لما رجعت البيت إعادة حفل تامر في الحديقة الصينية وجمهور الحفلة من مختلف الاعمار والطبقات معظمهم نفسه يسمع اغانيه والباقي داخل مخصوص يسمع جملته الشهيرة ( أيوة يا منطقة )
أول أغنيتين تقريبا عدوا بسلام وفجأة بنت حضنت تامر بضمة أشبه بضمة القبر وبنات ودموع ومناديل وبحبك يا تامر وفيهم واحدة صعبت عليا حسيت إن آخر أمنية ليها قبل ما تموت إنها تحضن تامر ماتعرفش إنها هتتشوي بيه في جهنم واللي يشد تامر من ايده والللي يشده من البنطلون وكل شوية المسرح يطبق وتلاقي البودي جاردات وكل واحد منهم يسد عين السمس بيحاولوا يبعدوا الناس وشباب ورجالة ببدل كله بيجري أقول القيامة قامت أتاريهم نفسهم يسلموا على تامر برضه يا خسارة الرجالة والبدل .

وتامر ربنا ما يقطع له عاده متعود يخلي جمهوره ينور الموبايلات في الأغاني الرومانسية والشحن عليه طبعا وليه؟ بدل التكلفه كل واحد يجيب معاه شمعه وواحد بس يطلب المطافي للظروف .
وتامر دعالهم ربنا يكرمهم كلهم ( دعوه مقبوله طبعا ) وقبل ما يمشي أهدالهم كاب عزيز عليه البنات قطعوا بعض عليه .

لو واحده فيهم بتفكر كانت زرعت الكاب في أرض خصبة ولما يطلع محصول الكابات توزعه ...... المهم إن آخر إعلان غريب على النت في سابقة علميه لا مثيل لها في مجال استنساخ البشر سيتم استنساخ مليون تامر حسني ( العدد قابل للزيادة ) يمكننا التحكم في عوامل الطول / والقصر /والسن / والمهنة / والديانه / والإسم
وفي كل الأحوال صوته حلو حامل جينات الرومانسية وجين المفاجآت
بادرو بالحجز نوصلك لحد البيت

كل ما تطلب أكتر فرصتك في الحصول على تامر هتكون أكبر والسعر مفاجأة 1000 جنيه
ويوصلك مع تامر قميص بدون زراير هدية وحظاظة وسلسلة
رقم التليفون 0000000
ملاين البنات في مصر والوطن العربي حجزوا المنتج
وربنا اللي يعلم كل واحده فيهم جايبه الفلوس أزاي (وكلهم بيقولوا عاوزين تامر بشنطة هدومه)
الشركة قامت بدراسة جدوى أخيرة قبل تصنيع المنتج ونشرت نتائج الدراسة على النت
· تقرر إنتاج 75% من تامر حسني مدرسين

و 25% مهن أخرى .
· بهذه النسبة ستحقق أرباح مضاعفة ونثري المجتمع عن طريق المنتج ( تامر حسني مدرس ) الذي له مفعول السحر في توصيل المعلومة وترغيب الطالب في المدرسة والقضاء على الدروس الخصوصية .وغدا القرار الأخير .
· البنات منتظرين القرار الأخير على أحر من الجمر وزهدوا الأكل والشرب والنوم وكلهم داخلين على النت وبسرعة ظهرت النتيجة ..........

· الشركة لغت إنتاج الطلبية لأن فيه أحتمال بسيط إن الطلبة من كتر حبهم لتامر حسني ( مدرس )
· هيوصلوا لحد ثالثة ثانوي ويسقطوا علشان مايبعدوش عنه والشركة هتستخدم التقنيات الحديثة للحصول على تامر حسني ( دكتور جامعة ) في المحاولة القادمة .
· أنتوا صدقتوه ولا إيه؟؟؟؟؟