أقولك أنا

تقوللي اكتر حاجه بتندمي عليها إيه ؟
أقولك إني كملت تعليمي .
قوللي ليه ؟؟
أقولَّك علشان مالاقيتش مكان يسعني غير سريري .
هتقوللي أكيد كنتي راسمه على وظيفه ميري .هقولَّك كنت راسمه على وظيفه خياليه قبل ما أدخل الكلية بمكتب وتكييف وسواق وعربيه، صبرك عليّا ، وفي أول سنه كليه الأحلام الورديه إتحولت لكوابيس واقعيه ساعتها بس إتمنيت أي وظيفة إن شاء الله ب100 .
تقوللي سهله دي دوري بذمه وضمير وانتي تلاقي .
أقولّك ماكدبش عليك أنا ماتعبتش نفسي ودورت ؛ لسبب بسيط لإن كل اللي حفيوا ودوروا ومكانوش فاضين يشتغلوا من كتر التدوير على شغل معظمهم لقي مثواه الأخير على قهوه وعمل عضويه فيها أو كوفي شوب في المناطق الراقيه وبيدفع الإشتراك السنوي لأن طبعا الحجز مقدما والباقين مقضينها كورسات وبيضحكوا على نفسهم ربما !!؟
تسألني إيه نصيحتك للأجيال اللي جايه ؟
أنصح كل طالب عرف يفك الخط بأنه يكتفي بهذا القدر من التعليم ، كده الحمد لله خدت حظك بتمضي وتقرا قرآن وجرايد ومجلات وكتب مهرجان ماما سوزان .
صدقني هتختصر سنوات العذاب من عمرك وتوفر ثمن الكشاكيل والساندوتشات ومش هتابع بورصة الزي المدرسي بإرتفعها المستمر وهتخلص من كتب المدرسه بمناهجها العقيمه اللي صدت دماغك وأهم حاجه مش هيوحشك سريرك.
والحكومه وقتها تعمل إحلال لكل المدارس الإعدادي والثانوي بالمدارس الإبتدائي وكفاياها بنى مدارس .
وتأمن لكل طالب مستقبله بالفلوس اللي كان هيتنور بيها وكل طالب حر اللي عاوز يجيب كانز واللي عاوز يشتري كيس شيبسي والمثقف اللي هيشتريله كتاب واللي عينه زايغه وهيجوز قبل ما يعنس واللي هيطير فلوسه وده بالظبط
زي اللي هيغامر ويكمل تعليمه .