حفل توقيع العدد الثالث مدونات مصرية للجيب

Time and Place Date: Tuesday, March 3, 2009
Time: 4:30pm - 7:30pm
Location: المركز الثقافى الدولى
Street: رقم 17 شارع السد العالى ميدان فينى الدقى الشارع المقابل لشيراتون الجزيرة
City/Town: Cairo,

أنا صاحبة حركة 14 فبراير

أنا صاحيه النهارده مبسوطه وفايقه على الدنيا كلها وواخده قرار إني أحتفل بالفالنتين.
تعالالي ياحبيبي ) ده البالطو الأحمر بتاعي )
فين طرحتك وكوفيتك؟ أهم
وجينزك؟ وآدي الجينز
وباليرينتك الحمرا؟ في الكومودينو
ونظارتك الشمس واكسسواراتك؟ في درج التسريحه
المانيكير الأحمر هايعطلني بس لابد منه
مالي طب وأنا مالي وأنا مالي بالأحزان أنا مالي... مالي طب وأنا مالي أنا مالي بالأحزان أنا مالي
عايشه في أحلى ليالي ويا حبيبي الغالي.
!!!وااااااااااااااااو إنتي بتتكلمي بجد القمر اللي أنا شايفاها فيكي دي تبقى أنا، هو الحب بيحلي أوي كده
يييييييه كنتي هاتنسيني نظارتي الشمس ودي بقى اللي هاتزبطلي الآداء، سلام بقى . مالي طب وأنا مالي أنا مالي.
مش عارفه ليه حاسه إن البالطو مش عايزني أركب الميكروباص ؛ ماشي يتلكعلي كده وعينه على التاكسيات ، وقام موقفلي تاكسي وركبني، " القسم ياسطى من فضلك"
هو إيه اللي إيه ! مالك مستغرب أوي كده " القسم يا اسطى"
حبايبي كثير في القسم نزلت على ظابط معرفه " أنا قاصداك في بوكس وكام أمين شرطه ؛ عايزه أقبض على كل الدباديب النهارده"
بس ده شغل الحي .... يبقى حضرتك تكلملي الحي مفيش وقت.
وقد كان
أنا قدامكم راكبه في البوكس جنبي الشباك وعلى الجنب التاني السواق متتتتتتعه، بس لو فكرت انزل وأجرب أركب ورا في نفس البوكس متعة من نوع تاني اكسسوار ايديّا فيها الكلابشات ودموع عينيّا حنفيه بتقول لاااااااااااااااااااااااء من الصدمه ربنا مايكتبهاش على حد فينا.
وطبعاً بتسألوا روحكم إيه سر الفرحه اللي بلمع في عينيّا ؟؟؟؟؟؟
سعيده بالدبابير اللي فجأه طلعتلي على كتفي والطبنجه اللي لقيتها متشعلقه في حزام البنطلون بس خايفه كمان شويه لساني يطول والآقي نفسي من غير ما أحس باشتم شتايم وحشه.
بااااااااس عندك ، أيوه هنا ؛ هو ده الشارع اللي فيه كل العربيات اللي بيتباع عليها الدباديب.
أنا ومستخبيه تحت نظارتي الشمس ... الشارع كله بيجري والدباديب بتاخدلها ساتر ، العربيات الكارو بتشوط الناس، ورجالتي بيشوفوا شغلهم، ولسه أنا هارفع إيدي بعلامة النصر لقيتهم بدأوا التراشق بالألفاظ والدباديب نزلت بإيدي بسرعه سديت وداني.
المعركه استمرت ربع ساعه انتهت لصالحنا، لقيت اسطول العربيات الكارو اللي شايله الدباديب جاي عليّا مسلم نفسه ، شكرت الرجاله على مجهودهم وقولتلهم فضوا عربيه اقعد عليها، إتربعت على العربيه والزباين عماله تهل عليّا.
كل زبون ييجي : بكام الدبدوب؟؟؟؟؟؟
أنا : مش بكام؛ دي متحرزه مش للبيع ، إتحايلوا عليّا ، وعدوني مش هايفاصلوا ، عرضوا عليّا يشتروا الدبدوب الواحد بثمن كل اللي في العربيه ، مضطرين النهارده الفالنتين ومفيش وقت، الولاد ملوا الشارع قدامي غالبا لإن الدبدوب هدية بناتي أما البنات معظم هداياهم للولاد ورد او بارفان او غيره .
هاتناقش معاكم وياتقنعوني يا أقنعكم ، وإنتوا مضطرين للأسف تسمعوني لإن أنا اللي معايا الدباديب " أنزل رجلي بقى تعبت من التربيع"


دبدوب زي ده ايه اللي فيه بيعبر عن الحب؟ ليه بقى الممثل الرسمي للفالنتين ؟حبنا ومشاعرنا واحساسيسنا يترجمها دبدوب!!!
فرضاً مفيش دبدوب خلصت الهدايا وطرق التعبير عن المشاعر؟؟؟؟
العادي : حبيبتك دلوقتي مستنيه دبدوب عيد الحب السنه دي عشان تكمل بيه الوان واحجام الدباديب اللي عندها لكن اللي مش عادي والجديد أوي واللي يفاجئها ويخليها تطير من الفرحه ويحسسها انك شغلت نفسك بيها وتعبت حبتين في فكرة هدية ويزود نقطك ويتحسبلك ومش ممكن يتنسي ان الهديه باختصار ماينفعش غيرك يجيبها وإنت ماتجيبهاش لحد غيرها.
أظن كده سهل أوي شغلوا مخكم ، وبدأت اهز رجلي منتظره حد ينزل عليه الوحي بفكره إن شا الله يقوللي هاكرمش 50 جنيه واديهالها.
واحد قاللي ينفع رساله قولتله ينفع جداً بس مش جاهزه وممكن كلمه، نظره ، خوف ، اغنية، خروجه، شعر ، رحله.
فجأه فردة باليرينا وقعت من رجلي وأنا باهزها، واحد من الواقفين جري مسكها ، وقاللي بس الدبدوب اسهل لي
هاتجيبيه ولا مش عايزه الجزمه تروحي كده؟
قولتله مش مهم الجزمه ولا هاحوش عنك الدباديب ؛ بس أهم حاجه إقتنعت ولا لأ ؟؟؟ اقتنعت بس مش هالحق افكر السنه دي عايز دبدوب؟ أنا شايفه عينك على الدبدوب الأحمر الكبير، أكيد ماعندكش خلفيه انه عشان يحمر كده بيغرقوه في دم الخفاش ، ومش بعيد تلزقوا في بعض وانت ماشي ومايطلعش غير بالطبل البلدي .
لأفلوسه مش هاتديهالي أنا صاحب العربيه جاي ........ سلام