اللهم اخزيك ياشوشو

اموت واعرف اللي إنت حاسس بيه بعد ماكشفت ألاعيبك وحركاتك القرعه, وساوس وسرحان وتوهان, رسمتلي الهدف واقنعتني إن كل همك مصلحتى في تحقيق حلم الرشاقه, وإني مش لازم اضيع مجهودي قبل رمضان مع دكتور التخسيس بالعكس ده أنا لازم أضاعفه في رمضان, عشان البس كووول اللبس الجديد في العيد
ودبستني في كام جيبه وبنطلون اصغر من مقاسي نمرتين؛ قال إيه هاحس بالإنجاز لما مقاساتي تصغر.بس برافو ياشوشو كسبتني في صفك أول أسبوعين في رمضان لا تركيز في صلاه ولا قراءة قرآن, أنا افطر من هنا وكل اللي يشغلني ياترى معلقة الرز الواحده بتتخن كام جرام وطيران وراها أتابع خط سيرها.
ده حتى لما صاحبتي قدمتلي طبق أم علي , إتصلت بالدكتور بتاعي قبل ما آكل .
ألو يادكتور هو الرقاق فيه كام كالوري والبندقه والفسدقه الواحده .. والمجروشه كمان؟؟؟
أم علي مين وزفت إيه, أنا في صلاة التراويح نسيت اقفل الموبايل ولازم أقفله فورا.. تيت تيت.
أيوه يادكتور هو الخط قطع ولاإيه!
كل ما أجرب ميزان الا قيه مزودها اوي , تقريبا بيخرفوا في رمضان.
كمان ضيعتلي معالم رمضان إنتى مش قادره تنزلي تتمشي وبتكسلي بعد الفطار والحل عندي, تشغللي مزيكا وقت التراويح وتعمللي رياضه في البيت " بيشتغلني وأنا واخده باللي واللعب بقى على المكشوف"
سؤال هو مش المفروض إنكوا متسلسلين في رمضان؟؟؟
ماترد ياعم الشيطان .
مش عارفه اقولك ولا لأ إن شكلك بقى زباله , دي مداخل شيطان ماقدرش اقول اكتر من كده.
بس مستحيل يكون شيطان لانهم متسلسلين فعلا. يبقى شياطين الإنس, وماشيطان إلا بني آدم , الكلام ده كبير اوي إنتي مستوعبه؟؟ ده معناه إن دي نفسك هي اللي .. معقول ! نفس شريره شيطانيه لابد أن تموت, سأ..سأ اقتل نفسي.
فين ورقة الشوربه السحريه ؟ اهه لقيتها


مكونات الشوربه وطريقة عملها وده الجزء الأول من الورقه بيقول هاتي أكبر حله عندك إغلي الميه لأماتخافيش مش إنتي, ده انتى هاتحطي الكرنبه وبصل وفلفل رومي وجزر وأي خضروات .
الجزء الثاني خطوات شربها .
بعد تمام النضج ولكي اصدقكي القول في حاجات اكيد هاتحسي بيها
· الشوربه دي للتخسيس مش لقتل النفس.
· لازم تحطي مشبك على مناخيرك وتغمي عينيكي.
· تلبسي بفته لإن وارد جدا إن المعلقه تلف وترجع تاني.
· احتمال احتجاب الرؤيه لثواني " ماتخافيش هاترجع تاني".
· الدنيا في عينيكي احتمال تبقى في خرم الإبره .
الجزء الأخير خلاصه من كاتبة الورقه بتقول فيها.
· لو عرفتي قيمة الكرنبه إزرعيها تحت الكنبه.
· لومسافره بلد مافيهاش كرنب يبقى الكرنبه تركب قبلك دي الكرنبه بقت هانم لا نملك إلا أن نرفع لها القبعه.
هي تقول زي ماهي عايزه لكن أنا طلعت عيله ورجعت في كلامي وهاشوفلي طريقه اسهل واحسن 1000000 مره من كده.
كانت تايهه عني فين . أنا هسيبها على ربنا ده عمره ماكسفني أكيد هاينصفني بشرط إني أصفي نيتي, وأطهر قلبي ببيتادين واعمل لربنا توكيل رسمي في الكبيره قبل الصغيره, وأتوسل إليه بإنه يخلع شيطاني من جذوره , ويعينني على قريني ليعلن إسلامه.
وأنا من بكره بدل ماكنت بافطرعشان أشبع,هافطر قليل بنية إني أكون نشيطه في صلاة التراويح, وهاتسحر لأن في السحور بركه, وهانوي الخير عشان الاقيه.
فوجئت بقلبي بيشكرني لإني خلصته من البلاك؛ وبيقوللي الأبيض هداللي اعصابي وريح عيني؛ قولتله عيب عليك ده واجب عليّا.

يارب وفق أبنائنا الطلبه في امتحان الكادر



يلاّ يا محمد إنقل لماما المكتب بتاعك في اوضتها, ولو عايز اي حاجه ماتقولش ياماما؛ لازم كلنا ندوس على نفسنا ونستحمل الفتره اللي جايه ؛ ده مستقبل ماما كله واقف على امتحان الكادر يعني المسأله بالنسبه لماما "تو بي اور نوت تو بي "
بابا: عايز تآكل عايز تشرب عايز اي خدمه قول بس ساره محسوبتك ساره. أنا عارفه طبعا قد ايه هو صعب عليك بس الأيام خلاص دخلت وماما أكنها في معسكر مجنده روحها للمذاكره..المذاكره وبس.
وانتى ياماما روقي كده وهدي اعصابك القلق والتوتر دول هيضيعوكي في الإمتحان وهيخفسوا بدرجاتك الأرض ... ريلاااااكس.
لعبنا كتير .. هزرنا كتير . ماما.. يلا ياحبيبتى على اوضتك إقري دعاء المذاكره وسمي كده على ما أنا أدخل على النت اجيبلك المنهج اللي هتذاكري منه , آآآدي المنهج صوريه واديه لكل زمايلك ماتبقيش أنانيه عشان ربنا يكرم؛ الحاجات دي ماتعرفيش بتفيد قد إيه.
ماما خدي مني الصينيه بسرعه لاحسن تقيله اوي؛ عاملالك 3 حاجات مره واحده... ده لبن وده شاي اما ده بقى عصيروطبق الساندوتشات ده عايزاه كوووله يخلص, وتنسيلي خااااااااالص التخن والكلام الفاضي ده؛ كلنا كنا بنتخن في الفتره دي , ولو عايزه شاي بلبن إدلقيهم على بعض ولا يهمك حتى لو شرشرتي تقدري تعتبريني الفليبينيه اللي بابا جابهالك.
مالك ياماما؟! شكلك زعلان أوي وكل ماأدخل الاقيكي سرحانه ومش مركزه .
ماما: لالا ولا حاجه.
أنا :إيه اللي خرجك من اوضتك ياماما؟؟؟
ماما: نفسي اشوف التليفزيون واقعد معاكوا شويه
واخده " ريست".
أنا : هو إنتى لحقتي لالالا ده إسمه تهريج يلاّ ياماما على اوضتك.


ماما : أصل أنا بصراحه مش فاهمه حاجه من المنهج ده . مختلف اوي عن مناهجنا زمان ولا عارفه أذاكر إيه ولا أبدأ منين.
أنا:آآه أهو ده اللي انا كنت خايفه منه , وساكته على نفسك ليه؟؟ كلمي اصحابك وشوفي بيذاكروا إزاي ومنين أو ذاكري معاهم وخليهم يشرحولك.. خدي درس لكن ماتقعديليش كده. إحنا قولنا اهه عشان الناس مايبقالهاش حجه بعد كده , موفرينلك الجو الناسب في ناس تتمنى ربع اللي انتى فيه ده ياماما, وإذا كان على النجاح كل الناس بتنجح . ليه ماتطلعيش من اوائل الكادر ؟! وتليفون من سيادة الوزير ورحلة للبنان او حج وعمره . اللي بيطلعوا الأوائل مش زايدين عنك حاجه بالعكس .
حاولت اشغل بابا عن موضوع التليفون اللي بقى مشغول باستمرار وقولتله مش ارقام الجلوس وصلت المدارس عشان يرد عليا ويقوللي هايروح يجيب لماما رقم جلوسها لقيته متنرفز جدا.
حاضر يابابا هاشوفلك مين اللي شاغل التليفون بقاله ساعتين . إهدى بس
يانهار مش فايت ماأنا لو قلت لماما بابا عايز التليفون هاتقوللي مستقبلي أهم. البيت هايخرب ياجدعان يارب استر أعمل إيه؟!
بابا عرف إن ماما كانت بتذاكر مع زمايلها في التليفون عشان يشرحولها. المشهد اللي بعده بابا بدأ يزعق ويقول " كده انا لازم اقاطع الأرضي دي الفواتير زادت 50%".
ماما قفلت وبدأت تتعصب "إنتوا كمان اللي مش عاجبكم هو انتوا فاكرين إن مذاكرة التليفون دي بتفهم حاجه اصلا, والله لأنا جايبه اصحابي يذاكروا معايا ويفهمونى هنا"
بابا قالها مفيش مانع اصحابك البنات لكن الشباب لأ.
ومن ساعة ماجم وأنا تقريبا بأقضي حياتي في المطبخ,وياريت بفايده . سمعتهم بالصدفه بيقولوا انهم كلهم مش فاهمين حاجه.
اعمل إيه بس ياربي باقي 3 أيام على الإمتحان , والمنهج جديد ومالهوش مدرسين, والامتحان لو كان هايتسرب كان زمانه اتسرب, ولو إني ماظنش هايتسرب الكبار في البلد دي غالبا بيبعدوا عن شغلانة التدريس.
ماما حادي بادي مفيش معاها مستحيل , أهم حاجه تسطير الورقه وترتيبها إفتحي نفس المصحح كده فكرك هو بيصحح!... ماعتقدش.
انا بعت محمد كارفور جابلك شنطه باك وباليرينا وقلم رصاص واستيكه وبرايه ومسطره وزمزميه وعلبه للصابونه.


وسامعه الوزير بيقول إنه آآآخر حاجه بيفكر فيها المصاريف اهم حاجه العائد من وراا الكادر مش كفايه هايكدر عليكوا حياتكم ! وهايوفرولكم في كل لجنه جو هادي وميه ساقعه ودكتور وجهاز ضغط وحقن بنسيلين ودعامات للقلب ومهدئات .
ماما عايزه كمان ألفت نظرك انه نسب النجاح متحدده مقدما وغالبا الإمتحان هاييجي تعجيزي عشان ماحدش ياخد الكادر.ووارد جدا تشوفي في اللجنه حالات إغماء وتشنجات وتقطيع شرايين وتقطيع شعر وورق إجابه وناس بتنتحر وترمي روحها من على الدكك ( دي قلة إيمان) كووووووول ده ما يأثرشي فيكي ركزي في إجابتك. الرزق بتاع ربنا وملعون أبو الكادر اللي هايذل المدرسين.