Sunday, June 1, 2008

الله لا يرجعها أيام

زي اليومين دول كل سنه كانت بتبقى اسود ايام حياتى,القلق كان يأنتم معايا ,والدموع أخلصها وابعت اشتري مخصوص من المغربي عشان اقدر اكمل بقية الإمتحانات , وأقضي 9 ساعات على المصليه ,والسجده مدتها توصل لنص ساعه لدرجة إن ماما كانت بتبقى خلاص هتبعت تشتري الكفن وتسلم فيّا,وتقول إنا لله وإنا إليه راجعون,لازم الصبر عند المصيبه الاولى عشان أفوز بجزاء الصابرين,ويتبنيلي قصر في الجنه يارب الهمنى الصبر .

سجده ممتعه جدا الحقيقه "منتهى الإخلاص في الدعاء والقرب من ربنا منتهى اليقين في الإجابه, لأ وإيه سجدة قبل الإمتحان مختلفه عن سجدة بعد الإمتحان وده كان تعريف سجود الإمتحان, وبعد التثبيته دي كلها أقوم أنا من السجده زي القرده, وماما هاتك يازعاق وتهزئ فيّا كوووووووووووول دي سجده ؟؟! اقولها إخص عليكي وأنا اللي فاكراكي هتفرحي إنى لسه عايشه وهتاخدينى في حضنك وتجيبيلي مكس بالموز
.
ماكنتش أحترم نفسي وأحافظ على مشاعرها وابدأ أذاكر مع الناس, لأ كنت اتسلك أوي لما أخاف واترعب والوقت يتسرق منى ... إتفرجوا عليّا وأنا باجري هنا وهناك واشتري ورق ,واتصل بصاحبتى تشرحهولي على التليفون , وإذا مافهمتش أبات على قلبها ليلة الإمتحان ماسيبهاش إلا لما تفضي دماغها في دماغي وانسيها إسمها" كل ذنبها إنها بتعرف ناس زباله كده ... تشرب بقى"
دماغي اسستمها وأقولها هاستسمحك في المعلومتين دول ولو فيها إساءة أدب خليهم عندك لحد الصبح بس وأنا أوعدك من النجمه هلقحهم في ورقة الإمتحان, بليز للساعه 9 بس؟
والحقيقه كانت بترحب جدا ومكانتش بتتعبنى لانها فاضيه ومهويه وكلها ملوخيه. كانت مابتصدق اعمرها عشان تقوم بالدور اللي اتخلقت عشانه بالفطره.
واقول للتركيز انا سايباك براحتك طول السنه عايزاك معايا 72 ساعه بالكتير , ماكانش بيتأخر, بس القلق كان يهز الإيريال,راح في داهيه التركيز.
ده كان ذل , كنت أنام مفتحه عينيّا ساعه أو ساعتين بالكتير ولحد دلوقت بادي لنفسي بدل نوم, وكوابيس ليلة الإمتحان حتى السنه دي جاتلى في المعاد ربنا يقطعلها العاده دي.
كمان الإمتحانات كان ليها أعراض إنى أنكش شعري واقعد في الاوضه الورق مغطينى..أغطي البراد بغطى السكريه ..أصب الشاي بارد .. نسيت اولع عليه.. إايه خير بتبصولي كده ليه؟؟ أنا لسه مافوتش ولا باشد في شعري, ولا بقرقض في ضوافري, وماتستغربوش اوي كده لما تعرفوا إنى كنت باتوضا من غير ماغسل ايدي إلى المرفقين واصلي بشعري وعكس القبله.. تفتكروا يجوز؟؟؟متهيألي اللي يوصل للحاله دي ليس عليه حرج.
لو أي حد في أي مرحله مابيحترمش نفسه وبيحصله ولو حاجه واحده من الأعراض دي , يبقى أهلا وسهلا بيه , ييجي يضم جنبي هنا مع البلدا ويصارح نفسه,هي دي اعراض البلاده.
أما الشاطرين بيبان عليهم وعارفين بيعملوا وهيعملوا ايه كويس اوي واعراضهم عكس دي خااااااااااالص, مش عيب ان الواحد يبقى بليد بس العيب انه لما يعرف ويكتشف في نفسه الموهبه يسكت على نفسه ويسيب المرض ينتشر في جسمه كله,
إوعوا تفتكروا إنى كنت في كلية التب..لأ .
حزروا فزروا ؟؟ الكليه اللي خرجت 3/4 سواقين التاكسي في مصر؟؟ واللي هيجاوب ليه منى مكس بالموز.